روسیه از تاجیکستان و افغانستان خواسته که هر نوع اختلاف میان دو کشور را به طرز قابل قبول به هر دو طرف، حل کنند.
تاس، خبرگزاری دولتی روسیه به نقل از وزارت خارجه روسیه گفته که روسیه در جریان گزارشهایی مبنی بر اعزام نیرو در مرز مشترک میان دو کشور قرار گرفته است.
الکسی زایتسف، سخنگوی وزارت امور خارجه به این خبرگزاری گفته است:”ما با نگرانی شاهد افزایش تنشها در روابط تاجیکستان و افغانستان و تبادل بیانیههای شدید از سوی رهبری دو کشور هستیم.”
او گفته است که براساس اطلاعاتی که طالبان به دست دادهاند دهها هزار نیروی ویژه این گروه به ولایت تخار، در شمالشرق افغانستان، در مجاورت تاجیکستان اعزام و مستقر شدهاند.
وزارت خارجه تاجیکستان و سخنگویان طالبان تاکنون در این مورد اظهار نظری نکردهاند.
پرسنل نظامی تاجیک در نزدیک مرز افغانستان
امامعلی رحمان، رئیس جمهور تاجیکستان دولت و کابینه طالبان را به رسمیت نشناخته و حمله به پنجشیر و محاصره آن از سوی طالبان را نقض حقوق بشر خوانده است.
طالبان نیز هشدار دادهاند که تاجیکستان به امور داخلی افغانستان نباید دخالت کند.
اخیرا برخی رسانهها گزارش دادند که برخی رهبران ضد طالبان و رهبران جبهه مقاومت ملی از جمله احمد مسعود و امرالله صالح در دوشنبه، پایتخت تاجیکستان تحت محافظت دولت این کشور به سر میبرند. این گزارشها به طور رسمی تایید نشده است.
در همین حال لوید آستین، وزیر دفاع ایالات متحده روز چهارشنبه، نسبت به وضعیت خلبانان افغان که از سوی آمریکا آموزش دیدهاند و در ماه گذشته با به قدرت رسیدن طالبان به تاجیکستان فرار کردند، ابراز نگرانی کرد.
بنا به گزارشها در آخرین ساعات جنگ، پرسنل نیروی هوایی افغانستان دهها هواپیمای نظامی را به تاجیکستان و ازبکستان منتقل کردند و برخی در آنجا بازداشت شدند.
ثبت ديدگاه